មេរៀនទី៣ៈ ជំងឺមិនឆ្លង

ជំងឺមិនឆ្លង ជាជំងឺដែលមិនបណ្ដាលមកពីភ្នាក់ងារបង្ករោគ ហើយមិនអាចឆ្លងពីសារពាង្គកាយមួយទៅសារពាង្គកាយផ្សេងទៀត។

ជំងឺមិនឆ្លង

១-ជំងឺទល់លាមក

ជំងឺទល់លាមក គឺលាមកក្លាយជាស្ងួត រឹង ហើយពិបាកបន្ទោរបង់។ ជំងឺនេះ បណ្ដាលមកពីមូលហេតុមួយចំនួនដូចជា

• របបអាហារខ្វះជាតិសែលុយឡូស
• កង្វះជាតិទឹក
• ការបរិភោគអាហារមិនទៀងទាត់
• កង្វះលំហាត់ប្រាណនិងពលកម្មក្នុងការរស់នៅ
• ការអង្គុយជាប់នៅមួយកន្លែងក្នុងរយៈពេលយូរ

២-ជំងឺកង្វះអាហារ

ជំងឺកង្វះអាហារ បណ្ដាលមកពីការបរិភោគអាហារគ្មានតុល្យភាព គឺអាហារមិនមានសារធាតុចិញ្ចឹមគ្រប់គ្រាន់។ កាលណាយើងបរិភោគអាហារខ្វះនូវសារធាតុចិញ្ចឹមណាមួយក្នុងរយៈពេលយូរហៅថា ជំងឺកង្វះអាហារ។ ឧទាហរណ៍ៈ ជំងឺខ្វះជាតិដែក ជំងឺកង្វះវីតាមីនC និងជំងឺខ្វះប្រូតេអ៊ីនជាដើម។

៣-ជំងឺធាត់

ជំងឺធាត់កើតឡើងដោយការបរិភោគអាហារច្រើនហួសក្នុងរយៈពេលយូរ ថាមពលទទួលបានពីអាហារច្រើនជាងថាមពលបញ្ចេញ។ ថាមពលដែលលើសក្នុងសារពាង្គកាយនឹងបំប្លែងទៅជាខ្លាញ់។

៤-ជំងឺលើសឈាម

ជំងឺលើសឈាម ជាជំងឺនៃការលើសសម្ពាធឈាមក្នុងសរសៃឈាមអាកទែ។ ជំងឺលើសឈាមអាចកើតឡើងដោយសារជាតិខ្លាញ់ក្នុងសរសៃឈាមអាកទែ ឬការស្ពៀតសរសៃឈាមអាកទែ។

មូលហេតុដែលអាចឱ្យលើសឈាមមានដូចជា បរិភោគអាហារសម្បូរជាតិខ្លាញ់ អាហារប្រៃ ការជក់បារី ការផឹកស្រា និងភាពធាត់ហួស ព្រមទាំងកង្វះលំហាត់ប្រាណ។

៥-ជំងឺទឹកនោមផ្អែម

ជំងឺទឹកនោមផ្អែម ជាជំងឺនៃការលើសបរិមាណគ្លុយកូសក្នុងឈាម។ គ្លុយកូសលើសបណ្ដាលមកពីលំពែងមិនអាចបញ្ចេញអរម៉ូនអាំងស៊ុយលីនបានគ្រប់គ្រាន់។ អាំងស៊ុយលីន មាននាទីបន្ថយកម្រិតជាតិស្ករក្នុងឈាម។ តែដោយកង្វះអាំងស៊ុយលីន ធ្វើឱ្យជាតិស្ករក្នុងឈាមលើស ហើយត្រូវបញ្ចេញមកក្រៅតាមទឹកនោម។

៦-ជំងឺបេះដូងនិងសរសៃឈាម

ជំងឺបេះដូង និងសរសៃឈាមកើតឡើងដោយសារបញ្ហាជាច្រើនដូចជា ការឡើងសម្ពាធឈាម ការបាត់បង់ភាពយឺតរបស់សរសៃអាកទែ ការកកស្ទះឬដាច់សរសៃឈាមនិងការគាំងបេះដូងជាដើម។ មានកត្តាជាច្រើនដែលអាចបណ្ដាលឱ្យកើតជំងឺបេះដូងដូចជា ការជក់បារី ការលើសទម្ងន់ និងកង្វះលំហាត់ប្រាណឱ្យបានទៀងទាត់។

៧-ជំងឺមហារីក

ជំងឺមហារីក ជាជំងឺដែលបណ្ដាលមកពីការលូតលាស់ខុសធម្មតានិងមិនអាចត្រួតពិនិត្យរបស់កោសិកាណាមួយ បង្កើតបានជាសំណុំហៅថា មហារីក។ មូលហេតុដែលបណ្ដាលឱ្យកើតមហារីកមានដូចជា កាំរស្មីX សំណល់គីមីក្នុងបរិស្ថាន ការជក់បារី ការបរិភោគអាហារមានជាតិខ្លាញ់ច្រើន និងការផឹកស្រា។

ចុចមើល  សំណួរ-ចម្លើយ