កម្រងសំណួរនិងអត្រាកំណែជីវវិទ្យាសិក្សាពីចម្ងាយ ថ្នាក់ទី១០

 

កម្រងសំណួរជីវវិទ្យា ថ្នាក់ទី១០
ឆ្នាំសិក្សាៈ ២០១៩-២០២០

ឈ្មោះ...................................... ថ្នាក់ទី១០(     ) ភេទ..........

ពិន្ទុ

មូលវិចារ

I.      ចូរគូសរង្វង់ជុំវិញតួអក្សរ a, b, c ឬ​ d ពីមុខចម្លើយត្រឹមត្រូវតែមួយគត់។

1)    ដំណើរការដែលកោសិកាបំបែកគ្លុយកូសក្នុងស៊ីតូប្លាសនិងមីតូកុងឌ្រីនៃកោសិកា ហើយបញ្ចេញថាមពល ឧស្ម័នកាបូនិច និងទឹកហៅថាអ្វី?

a.    ល្បើង

b.    ដង្ហើមកោសិកា

c.     រស្មីសំយោគ

d.    ការបញ្ចេញថាមពល

2)    តើដង្ហើមកោសិកានិងល្បើងខុសគ្នាដូចម្ដេច?

a.    ដង្ហើមកោសិកាប្រព្រឹត្តទៅនៅក្នុងមីតូកុងឌ្រី ឯល្បើងប្រព្រឹត្តទៅនៅក្នុងស៊ីតូប្លាសនៃកោសិកា។

b.    ដង្ហើមកោសិកា បំបែកគ្លុយកូស ឯល្បើងបំបែកស្ករផ្សេងទៀត។

c.     ដង្ហើមកោសិកាត្រូវការអុកស៊ីសែន ដោយឡែកល្បើងមិនត្រូវការអុកស៊ីសែន ហើយផលិតបានថាមពលតិចតួច។

d.    ដង្ហើមកោសិកាប្រព្រឹត្តទៅចំពោះសារពាង្គកាយអឺការីយ៉ូត ល្បើងប្រព្រឹត្តទៅចំពោះតែប្រូការីយ៉ូត។

3)    តើឃ្លាណាមួយត្រឹមត្រូវ

a.    ភាវរស់ស្ទើរតែទាំងអស់ទទួលបានថាមពលដោយផ្ទាល់ឬប្រយោលពីថាមពលពន្លឺព្រះអាទិត្យក្នុងរយៈពេលធ្វើរស្មីសំយោគ។

b.    ភាវរស់ទាំងអស់ទទួលបានថាមពលដោយផ្ទាល់ពីរុក្ខជាតិដែលជាសារពាង្គកាយស្វ័យជីព។

c.     ភាវរស់ទាំងអស់ទទួលបានថាមពលពីអាហារដែលវាផលិតបានតាមរស្មីសំយោគ។

d.    សត្វទាំងអស់ទទួលបានថាមពលពន្លឺព្រះអាទិត្យដោយប្រយោលពីថាមពលដែលស្មៅទទួលបានដោយសាររស្មីសំយោគ។

4)    តើសាច់ដុំបេះដូងជាសាច់ដុំដូចម្ដេច?

a.    សាច់ដុំរលីង អឆន្ទៈ មានឆ្នូត បំពេញនាទីពេញមួយជីវិត។

b.    សាច់ដុំរលីង អឆន្ទៈ មានឆ្នូត បំពេញនាទីឆាប់នឿយហត់។

c.     សាច់ដុំជាប់ឆ្អឹង ឆន្ទៈ មានឆ្នូត មានប្រតិកម្មរហ័ស  បំពេញនាទីឆាប់នឿយហត់។

d.    សាច់ដុំអឆន្ទៈ គ្មានឆ្នូត មានប្រតិកម្មយឺត និងមិនឆាប់នឿយហត់។

5)    សាច់ដុំដែលជួយឱ្យឆ្អឹងមានចលនាជា

a.    សាច់ដុំបេះដូង

b.    សាច់ដុំជាប់ឆ្អឹង

c.     សាច់ដុំអាការៈក្នុង

d.    សាច់ដុំរលីង

6)    តើអំភីបមានន័យដូចម្ដេច?

a.    រស់នៅក្នុងមជ្ឈដ្ឋានពីរ គឺក្នុងទឹកផងនិងលើគោកផង

b.    កង្កែប គីង្គក់ ហ៊ីង និងកញ្ចាញ់ចេក

c.     សត្វឆ្អឹងកងអថេរកម្ដៅ​ រស់នៅតែក្នុងទឹកប៉ុណ្ណោះ

d.    សត្វដែលវដ្ដជីវិតរបស់វាឆ្លងកាត់បម្រែរូប

7)    តើលក្ខណៈណាមួយដែលសត្វក្នុងថ្នាក់បក្សីនិងថនិកសត្វមានដូចគ្នា?

a.    សត្វមានរោម

b.    បេះដូងមានបីថត

c.     សត្វឆ្អឹងកងផលិតទឹកដោះ

d.    សត្វឆ្អឹងកងថេរកម្ដៅ

8)    តើសត្វថេរកម្ដៅជាសត្វដូចម្ដេច?

a.    សត្វដែលមានស្បែកនិងរោមក្រាស់

b.    សត្វដែលបញ្ចេញញើសនៅពេលកម្ដៅខ្លាំង

c.     សត្វដែលអាស្រ័យកម្ដៅព្រះអាទិត្យដើម្បីបង្កើនកម្ដៅរាងកាយរបស់វា

d.    សត្វដែលអាចរក្សាសីតុណ្ហភាពក្នុងខ្លួនវាឱ្យនៅថេរបើទោះជាមជ្ឈដ្ឋានខាងក្រៅប្រែប្រួលក៏ដោយ

II.    ចូរបំពេញល្បះខាងក្រោម

1.    សាច់ដុំភ្ជាប់ទៅនឹងឆ្អឹងដោយសារ......................។ ឆ្អឹងភ្ជាប់គ្នាដោយសារ..........................។

2.    ខួរឆ្អឹងមានពីរប្រភេទគឺ..............................និង............................។ ក្នុងនោះ........................... មាននាទីសំខាន់ក្នុងការផលិតកោសិកាឈាម ប៉ុន្តែ ក្នុងករណីបាត់បង់ឈាមច្រើន.......................... ក៏ជួយផលិតកោសិកាឈាមដែរ។

3.    កន្លែងដែលឆ្អឹងពីរនៅជាប់គ្នាហៅថា................................... ត្រូវបានបែងចែកជាពីរយ៉ាងគឺ......................................និង....................................។

4.    បាក់តេរីជាឯកកោសិកា....................................ពីព្រោះកោសិការបស់វាពុំមានណ្វៃយ៉ូពិតប្រាកដ។ សម្ភារៈតំណពូជរបស់បាក់តេរីស្ថិតនៅជារង្វេលក្នុង..............................។ ធាតុកោសិកាសំខាន់តែមួយគត់របស់បាក់តេរីគឺជា..............................ដែលជាកន្លែងសំយោគប្រូតេអ៊ីន។

5.    ដង្ហើមកោសិកាមានពីរដំណាក់កាល។ ដំណាក់កាលទី១ ប្រព្រឹត្តទៅនៅក្នុង................................នៃកោសិកា។ ក្នុងដំណាក់កាលនេះ ...................................ត្រូវបានបំបែកជាម៉ូលេគុលតូចៗ ហើយបញ្ចេញបរិមាណថាមពលតិចតួច។ ដំណាក់កាលទី២ ប្រព្រឹត្តទៅនៅក្នុង.............................នៃកោសិកា។ ម៉ូលេគុលស្ករតូចៗផ្សំជាមួយ..................................ហើយបញ្ចេញបរិមាណថាមពលយ៉ាងច្រើន ព្រមទាំងផលិតបាន...............................និង..............................។

III.   ចូរឆ្លើយនឹងសំណួរខាងក្រោមឱ្យបានត្រឹមត្រូវ

1.    ចូរប្រៀបធៀបលក្ខណៈខុសគ្នារវាងរជ្ជៈផ្សិតនិងរជ្ជៈរុក្ខជាតិ។

2.    ក. ដូចម្ដេចដែលហៅថា សន្លាក់?

ខ. តើសន្លាក់មានប៉ុន្មានយ៉ាង? អ្វីខ្លះ? ចូរបញ្ជាក់ ព្រមទាំងលើកឧទាហរណ៍ក្នុងប្រភេទនីមួយៗផង។

3.    តើដង្ហើមកោសិកានិងរស្មីសំយោគមានទំនាក់ទំនងនឹងគ្នាយ៉ាងដូចម្ដេចខ្លះ?

4.    ចូរប្រៀបធៀបល្បើងនិងដង្ហើមកោសិកា។

5.    តើផលិតផលរបស់រស្មីសំយោគមានប្រយោជន៍ដូចម្ដេចខ្លះ?

______________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________________

អត្រាកំណែ

កម្រងសំណួរជីវវិទ្យាសិក្សាពីចម្ងាយ ថ្នាក់ទី១០ (ពិន្ទុអតិបរមា ៣៨)

ឆ្នាំសិក្សាៈ២០១៩-២០២០

I.      គូសរង្វង់ជុំវិញតួអក្សរ a, b, c, ឬ​ d​ (គូសត្រូវមួយសំណួរបាន ០.៥ពិន្ទុ, សរុប ៤ពិន្ទុ)

1)    b.       (០.៥ពិន្ទុ)

2)    c.        (០.៥ពិន្ទុ)

3)    a.       (០.៥ពិន្ទុ)

4)    a.       (០.៥ពិន្ទុ)

5)    b.       (០.៥ពិន្ទុ)

6)    a.       (០.៥ពិន្ទុ)

7)    d.       (០.៥ពិន្ទុ)

8)    d.       (០.៥ពិន្ទុ)

II.    បំពេញល្បះ (ត្រូវមួយពាក្យបាន ០.៥ពិន្ទុ សរុប ៩ពិន្ទុ)

1.    សរសៃពួរ        សរសៃចំណង

2.    ខួរឆ្អឹងក្រហមនិងខួរឆ្អឹងលឿង(ឬខួរឆ្អឹងលឿងនិងខួរឆ្អឹងក្រហម)     ខួរឆ្អឹងក្រហម    ខួរឆ្អឹងលឿង

3.    សន្លាក់           សន្លាក់ចល័តនិងសន្លាក់អចល័ត(ឬសន្លាក់អចល័តនិងសន្លាក់ចល័ត)

4.    ប្រូការីយ៉ូត       ស៊ីតូប្លាស        រីបូសូម

5.    ស៊ីតូប្លាស        គ្លុយកូស         មីតូកុងឌ្រី        អុកស៊ីសែន          ឧស្ម័នកាបូនិច            ទឹក

(ចំពោះម៉ូលេគុលដូចជាគ្លុយកូស អុកស៊ីសែន.... សិស្សអាចសរសេររូបមន្តម៉ូលេគុលក៏បាន)

III.   ផ្នែកសំណួរត្រិះរិះ (២៥ពិន្ទុ)

1.    ប្រៀបធៀបលក្ខណៈខុសគ្នារវាងរជ្ជៈផ្សិតនិងរជ្ជៈរុក្ខជាតិ (ត្រូវមួយចំណុចបាន ០.៥ពិន្ទុ)

រជ្ជៈផ្សិត -      សារពាង្គកាយពហុកោសិកាឬឯកកោសិកា -      បរជីព -      គ្មានក្លរ៉ូប្លាស -      ភ្នាសគ្រោងជាតិគីទីន

រជ្ជៈរុក្ខជាតិ -      សារពាង្គកាយពហុកោសិកា -      ស្វ័យជីព -      មានក្លរ៉ូប្លាស -      ភ្នាសគ្រោងជាតិសែលុយឡូស

2.    ក. សន្លាក់ ជាកន្លែងដែលឆ្អឹងពីរនៅជាប់គ្នា។ (ឬសន្លាក់ ជាកន្លែងដែលភ្ជាប់គ្នារវាងឆ្អឹងនឹងឆ្អឹង ឆ្អឹងនិងឆ្អឹងខ្ចី ឬធ្មេញនឹងឆ្អឹងថ្គាម។) (២ពិន្ទុ)

ខ. សន្លាក់មានពីរយ៉ាងគឺ(១ពិន្ទុ) សន្លាក់ចល័ត(១ពិន្ទុ) និងសន្លាក់អចល័ត(១ពិន្ទុ)។

-      សន្លាក់ចល័ត ជួយឱ្យឆ្អឹងមានចលនា ដូចជា សន្លាក់ម្រាម សន្លាក់កែងដៃ សន្លាក់ជង្គង់...។(២ពិន្ទុ)

-      សន្លាក់អចល័ត មិនធ្វើឱ្យឆ្អឹងមានចលនា ដូចជា សន្លាក់លលាដ៍ក្បាល សន្លាក់ឆ្អឹងតូចកំភួនដៃនឹងឆ្អឹងធំកំភួនដៃ សន្លាក់ឆ្អឹងថ្គាមនឹងធ្មេញ...។ (២ពិន្ទុ)

(សិស្សអាចរកឧទាហរណ៍សន្លាក់ផ្សេងពីនេះក៏បានឱ្យតែត្រឹមត្រូវទៅតាមប្រភេទសន្លាក់នីមួយៗ។)

3.    ដំណើររស្មីសំយោគនិងដង្ហើមកោសិកា ជាដំណើរពីរផ្ទុយគ្នា តែអាស្រ័យគ្នាទៅវិញទៅមក។(១ពិន្ទុ) រស្មីសំយោគ ត្រូវការទឹកនិងឧស្ម័នកាបូនិចដើម្បីផលិតគ្លុយកូសនិងអុកស៊ីសែន។ (១ពិន្ទុ)គ្លុយកូសនិងអុកស៊ីសែន ត្រូវបានប្រើប្រាស់ជារូបធាតុដើមក្នុងដង្ហើមកោសិកាដើម្បីផលិតថាមពល ទឹក និងឧស្ម័នកាបូនិច។ (១ពិន្ទុ) បន្ទាប់មក ទឹកនិងឧស្ម័នកាបូនិច ត្រូវបានប្រើប្រាស់ឡើងវិញនៅក្នុងដំណើររស្មីសំយោគ។ ដូចនេះ ដំណើរទាំងពីររួមគ្នាបង្កើតជាវដ្ដមួយដែលរក្សាស្ថេរភាពរវាងឧស្ម័នកាបូនិចនិងអុកស៊ីសែនក្នុងបរិយាកាស។(១ពិន្ទុ)

4.    ប្រៀបធៀបល្បើងនិងដង្ហើមកោសិកា

+ លក្ខណៈដូចគ្នា៖ ប្រតិកកម្មគីមីបំបែកស្ករក្នុងកោសិកា ដើម្បីបញ្ចេញថាមពល(០.៥ពិន្ទុ)

+ លក្ខណៈខុសគ្នា៖ (ត្រូវមួយចំណុចបាន ០.៥ពិន្ទុ)

ល្បើង -      កើតនៅក្នុងស៊ីតូប្លាស -      ពុំប្រើប្រាស់អុកស៊ីសែន -      បញ្ចេញថាមពលតិចតួច -      ពុំផលិតទឹក

ដង្ហើមកោសិកា -      កើតឡើងក្នុងស៊ីតូប្លាសនិងមីតូកុងឌ្រី -      ប្រើប្រាស់អុកស៊ីសែន -      បញ្ចេញបរិមាណថាមពលច្រើន -      ផលិតទឹក

5.    ផលប្រយោជន៍នៃផលិតផលរបស់រស្មីសំយោគ

·       គ្លុយកូស៖

-      ជាប្រភពអាហារសម្រាប់អ្នកផលិតផ្ទាល់ និងសម្រាប់សារពាង្គកាយដទៃ (១ពិន្ទុ)

-      បំប្លែងជាសមាសធាតុដទៃប្រើប្រាស់ក្នុងតម្រូវការចាំបាច់ផ្សេងៗនិងអាចស្តុកទុកជាអាហារបម្រុង (១ពិន្ទុ)

·       អុកស៊ីសែន៖

-      ចាំបាច់សម្រាប់ដង្ហើមកោសិកា ដើម្បីផលិតថាមពល(១ពិន្ទុ)

-      ធាតុបង្កនៃស្រទាប់អូសូន ជួយការពារផែនដីពីការឡើងកម្ដៅ(០.៥ពិន្ទុ)

 

                              ថ្ងៃសៅរ៍ ១២កើត ខែស្រាពណ៍ ឆ្នាំជូត ទោស័ក ព.ស២៥៦៤

                                                       ព្រៃព្នៅ. ថ្ងៃទី១ ខែសីហា ឆ្នាំ២០២០

                                                                         អត្រាកំណែ

 

                                                                                                 ហឿ កំហុង