បាក់តេរី

រូបផ្គុំ

បាក់តេរី ជាសារពាង្គកាយឯកកោសិកា ប្រូការីយ៉ូត គឺគ្មានណ្វៃយ៉ូពិតប្រាកដ ដែលភាគច្រើនជាសារពាង្គកាបរជីព ខ្លះទៀតជាស្វ័យជីព។
រូបផ្គុំបាក់តេរីនីមួយៗ រួមមានភ្នាសគ្រោង ភ្នាសស៊ីតូប្លាស ស៊ីតូប្លាស រីបូសូម និងមានសម្ភារៈតំណពូជស្ថិតនៅកណ្ដាលស៊ីតូប្លាស គ្មានភ្នាសណ្វៃយ៉ូរុំព័ទ្ធ។ បាក់តេរីខ្លះ មានផ្លាសែល មួយឬច្រើនសម្រាប់ផ្លាស់ទី ខ្លះមានស្ពានចម្លង(Pili) សម្រាប់ភ្ជាប់គ្នានិងសម្រាប់បន្តពូជដោយជំនាប់ប្តូរ បាក់តេរីខ្លះមានប្លាស្មីត ជាសម្ភារៈតំណពូជស្ថិតនៅជារង្វង់តូចមួយក្បែរភ្នាសស៊ីតូប្លាស ខ្លះទៀតមានភីមប្រ៊ី ដែលជាសរសៃរៀវ ឆ្មារៗ ប្រើសម្រាប់ភ្ជាប់គ្នាក្នុងការរស់នៅជាកូឡូនី ឬសម្រាប់ភ្ជាប់ទៅនឹងទម្ររបស់វា។ ចំណែក បាក់តេរីខ្លះទៀត រុំព័ទ្ធដោយ កាប់ស៊ុល ដែលជាស្រោបអន្ធិល កើតឡើងពីជាតិស្ករនិងប្រូតេអ៊ីន ស្រោបជុំវិញភ្នាសគ្រោង សម្រាប់ការពារបាក់តេរី ទល់នឹងលក្ខខណ្ឌមិនសមប្រកបនៃមជ្ឈដ្ឋានរស់នៅ។
ផ្អែកតាមរូបរាង គេចែកបាក់តេរីជាបីបែបផ្សេងគ្នារួមមាន៖ កុកស៊ី (បាក់តេរីមានរាងស្វ៊ែ) បាស៊ី (បាក់តេរីមានរាងដំបង) និងស្ពៀរីឡូម (បាក់តេរីមានរាងស្ពៀ)។

បាក់តេរីបីប្រភេទ

រូបផ្គុំបាក់តេរី

របៀបចិញ្ចឹមជីវិត

បាក់តេរីភាគច្រើនជា បរជីព ដែលមានរបៀបចិញ្ចឹមជីវិតជាសាប្រូភីត ឬបរាសិត។ បាក់តេរីសាប្រូភីត អាស្រ័យអាហារស្រូបពីរូបធាតុពុករលួយ ពីសាកសពសត្វ ឬសំណល់រុក្ខជាតិ។ ចំណែក បាក់តេរីបរាសិត ពឹងអាហារបានពីធ្មួល។ បាក់តេរីខ្លះទៀត ជាសារពាង្គកាយស្វ័យជីព។ វាអាចផលិតអាហាររបស់វាដោយខ្លួនឯង តាមលំនាំគីមីសំយោគ និងខ្លះតាមរស្មីសំយោគ។

ការបន្តពូជរបស់បាក់តេរី

ក/. ការបន្តពូជដោយឥតភេទ

ការបន្តពូជដោយឥតភេទរបស់បាក់តេរី ជាទូទៅ ធ្វើឡើងតាមរយៈ ការចែកខ្លួនជាពីរ។ ក្នុងការបន្តពូជរបៀបនេះ ដំបូង បាក់តេរីមួយ លូតលាស់ ហើយដំឡើងទ្វេសម្ភារៈតំណពូជ។ បន្ទាប់មក វាចែកសម្ភារៈតំណពូជជាពីរ រួចធ្វើចំណែកស៊ីតូប្លាស បង្កើតបានបាក់តេរីពីរដូចគ្នា និងដូចទៅនឹងបាក់តេរីមេ។

ខ/. ការបន្តពូជដោយភេទរបស់បាក់តេរី

បាក់តេរីខ្លះ បន្តពូជដោយភេទ តាមរយៈជំនាប់ប្តូរ។ ក្នុងការបន្តពូជរបៀបនេះ ត្រូវមានបាក់តេរីពីរ ដែលមួយជាអ្នកផ្ដល់ និងមួយទៀតជាអ្នកទទួល។ ដំបូង បាក់តេរីមួយដែលជាអ្នកផ្ដល់ពន្លយស្ពានចម្លង ភ្ជាប់ទៅនឹងបាក់តេរីមួយទៀត។ បន្ទាប់មក វាដំឡើងទ្វេសម្ភារៈតំណពូជ(ប្លាស្មីត) រួចផ្ទេរសម្ភារៈតំណពូជដែលចម្លងបានទៅឲ្យបាក់តេរីមួយទៀតតាមស្ពានចម្លង ធ្វើឲ្យបាក់តេរីនោះ មានបន្សំសម្ភារៈតំណពូជថ្មី។ ការបន្តពូជរបៀបនេះ ពុំបង្កើនចំនួនបាក់តេរីទេ ប៉ុន្តែ វាអាចធ្វើឲ្យបាក់តេរីមួយទៀត មានសម្ភារៈតំណពូជថ្មី ដែលអាចបន្ស៊ាំនឹងមជ្ឈដ្ឋានរស់នៅ។

ជំនាប់ប្តូរ

ក្រៅពីជំនាប់ប្តូរ បាក់តេរីមួយអាចទទួលបានសម្ភារៈតំណពូជ របស់បាក់តេរីមួយទៀតតាមរយៈវីរុសយ៉ូផាស ដែលបាននាំយកសម្ភារៈតំណពូជពីបាក់តេរីមួយ ហើយបញ្ចូលវាទៅក្នុងបាក់តេរីមួយទៀត។ លើសពីនេះ នៅពេលណាបាក់តេរីមួយងាប់ សម្ភារៈតំណពូជរបស់វាអាចចូលទៅក្នុងបាក់តេរីផ្សេងទៀត។